吞拿魚芝士焗薯

週末的早餐我喜歡All Day Breakfast。除了煙肉、腸仔、多士、蛋，沙甸魚亦是我們碟上的"常客"。食法好簡單，只要拉開罐頭蓋，將整罐魚放入焗爐輕輕加熱幾分鐘，再將暖暖的沙甸魚塗在多士上 (可以加蕃茄或牛油果，味道會更正)。揀選沙甸魚我覺得除了產地很重要之外，製作過程亦很重要。葡國老人牌是100%葡萄牙製造，優質天然，鮮捕鮮製，符合我的要求。

查看資料才知，Porthos擁有超過100年製造罐頭魚的經驗，以葡萄牙傳統製法揉合百年經驗精心製造，而且產品是以人手處理，確保產品能夠長期維持高質水準。而重點，是一開罐頭，條魚仲好整齊，不會蓉蓉爛爛。

不過今次project 的主角其實是Porthos的新產品，吞拿魚。吞拿魚食法千變萬化，可以當前菜或正餐，冷熱食皆宜。今次我用吞拿魚做了個小點，可以做party小食，亦可當晚餐的side dish。為了令味道更豐富，今次特別選用了"辣油"口味。值得一提，是老人牌吞拿魚是採用菜油製成，不會為了味道而犠牲了健康。

素米紙卷

薄薄的米紙包實色彩繽紛的餡料，未放入口已經是一種視覺享受，這就是米紙卷最吸引的原因。越泰菜食的米紙卷好多時會有蝦或扎肉，當然米粉和金不換都是不能少。不過為了配合個人瘦身計劃，今次我做了全素版本，餡料只用了沙律菜。

其實製作過程一點都不難，最重要是處理米紙。由超市買回來的乾米紙，只要用暖水略浸10-15秒就會慢慢變軟。米紙有八至九成變軟便可以放在乾毛巾上備用，放在乾毛巾上的好處是毛巾有助吸收米紙多餘的水份。若果米紙在水中浸得過長，卷時會較容易弄破。

其實素米紙卷味道比較清淡，靠蘸汁調味。而做出蘸汁最重要的材料就是時間，因為用的全部都是鮮材料，拌勻後要放入雪櫃靜置最少30分鐘，讓味道混合。

玉子燒

玉子燒製作簡單，口感棉滑，做前菜或主菜都能令我食不過停口。玉子燒源於日本，主要分為關東關西兩種口味，關東的主要用味醂/糖調味，味道較甜; 關西的則用醬油、上湯或鹽為主要調味。兩種不同的風味，各有千秋，我本身不太愛甜食，所以較喜歡關西的煮法。為了令蛋更軟滑，我在蛋漿裡加了少許忌廉，沒有忌廉可用1湯匙鮮奶代替。

以前總以為玉子燒必定要用長方形的特別煎鍋才做到，原來用一般的圓形平底煎鍋都可以做到靚靚玉子燒。只要花少少時間慢慢卷，大約15分鐘就可完成。


初次製作小貼士: 用直徑較細的圓形平底煎鍋會較容易卷起玉子燒

煙三文魚醬配心心多士

<自家二人浪漫 5 course dinner> 之頭盤


明天就是一年一度令男士最頭痛的日子。雖然俗語有云，若是相愛，天天都是情人節，不過身為女仔，又怎會想平凡的過這一天呢? 現今情人節已被過度商業化，所以我不喜歡在情人節正日外出消費，尤其是食晚餐，人多又只能點set menu.....實在感受不到浪漫。最近兩年我都是在家中慶祝，無需煮九大簋，只要做幾道簡單的菜色，點支蠟燭再開支酒，氣氛一樣好好。


在家中煮情人節晚餐，可以參考以下幾個小貼士:
1. 菜色要簡單 - 最好選擇一些準備時間短或可預先準備 (且清潔簡單)的菜色，太複雜的話，出錯機會多，好危險
2. 份量要細 - 5道菜，每道食兩口都已經很多，所以份量要控制得很好，不然到第三道菜就無法食下去
3. 一定要有甜品 - 甜品是非常重要的，不過食完四個course 後，可能已經有點飽，可以考慮兩個人分享一份(當然要餵對方食)
4. 切勿落太多蒜蓉/煮得太辣 - 免得想咀咀時口有異味或想噴火
5. "漫煮"  - 別心急要一次過將所有東西煮熟，可以邊食邊煮，有些簡單步驟可以找伴侣一起完成，實行漫煮漫食 ~
6. 擺碟 - 注要細節，例如碟邊要乾淨。選菜可揀一些紅色的材料，或加入心心圖案增添氣氛


以下是自家廚房今年的情人節推介，希望大家煮得開心:

• 煙三文魚醬配心心多士
• 紅菜頭沙律
• 烤紅椒濃湯
• 巴馬火腿包烤雞
• 桂花梨子

先介紹頭盤 - 煙三文魚醬配心心多士:

這道菜建議預先準備，可以在烹調其餘菜色時你餵我，我餵你 <3

日式大根

冬季是白蘿蔔盛產期，味道清甜且價錢平。不過買一條蘿蔔，通常都要食兩三餐，第二晚還可，第三晚就會開始覺得悶。早前有朋友生日，去了一間小小的日式居酒/串燒店，店主(兼大廚)傳授了他的大根食譜，原來非常容易做。

日式大根，除了可以當主菜，亦可作派對小食或前菜，要注意的是浸醃的時間，第一次做，蘿蔔最好不要切太厚，否則浸醃時間較難控制。有朋友喜歡較淡的醬油味道(可突出蘿蔔味)，亦有朋友喜歡濃濃的醬油味(伴酒或當主菜食較佳)，所以你可因個人喜好加減甜(味醂)或咸(醬油)味。

煙三文魚配法包

5course 聖誕大餐的第一道菜就是這個頭盤，為免浪費食物，每道菜都只是做了細細份。一般在麵包店買到的法包都是長長的，不過如果只是兩個人食，香港天氣潮濕，食完半條法包已經變軟。所以近期我喜歡買細細個的法包，買一至兩個已經夠一餐，方便得多。切法包一定要用利刀，因為法包比較脆，刀不夠利會令到法包邊凹凹凸凸。

至於調味方面，與煙三文魚最好朋友的當然是cream cheese，不過因為份量用得不太多，若果是怕浪費的話，可以轉用奇妙醬/蛋黃醬，味道雖然差少少，但勝在方便 =) 

德國薯仔沙律

德國薯仔沙律是早兩星期在家中慶祝 oktoberfest 的其中一個菜色。正宗德國薯仔沙律的特色是加了醋，食時好開胃，感覺有點像食炸魚薯條時蘸醋一樣。而另一個特點是冷熱食都一樣好味，我自己就較喜歡熱食。

韓式菠菜沙律

菠菜沙律，係每次韓燒前一定會食o既前菜其中一碟。比起泡菜同其他"小碟"，菠菜沙律o既製作時間短好多，只需幾分鐘就完成。有時喺家中宴客，想喺準備飯餸時有啲野俾朋友食，除咗拍青瓜或海蜇之外，哩個都係一個好選擇。

今次我係用咗韓式醬油，如果屋企冇的話，我曾經試過用生抽加少少糖都可以。味道當然冇咁地道啦，但係都呃到人架 ~

魷魚沙沙

早兩日同舅父食飯，一輪風花雪月後舅父突然問起<自家廚房>的近況如何...哎呀...唔識答添 =P
確實2013年真係冇咩時間理過個blog...成日都冇事忙，都唔知啲時間去哂邊。襯哩兩日放完中秋長假，一於坐定定update 吓先。

雖然已經過埋中秋，但好似一點秋意都沒有，天氣熱悶， 都係鍾意食啲冰涼小食解解暑。之前幾個月因為屋企附近o既街市裝修，搞到買餸鬼咁唔方便。上星期街市終於重開，不過只係得幾個檔口開咗，值得開心o既係魚檔同海鮮檔都大咗，多咗選擇 =)  為咗支持吓啲街坊生意，雖然已經夠餸，都特登買咗啲魷魚仔，加埋落個頭盤到~

其實salsa 除咗可以配多士亦可以用來食粟米片，另一個食法就係配牛扒或雞柳(只需煎熟後再喺扒上面放少少salsa即可)。

日式凍豆腐

好多時食日本菜都會叫哩個凍豆腐，原來做法好簡單，用的都係一般日本菜會用到的醬料。如果想口感同味道豐富啲可以加少少目魚碎，加唔加都得。我覺得做哩個前菜最難o既地方就係要將啲豆腐切到正正方方(為咗令啲豆腐靚仔啲，啲邊邊都切走哂...為免浪費我通當會攞啲邊位去其他餸或味噌湯)。至於有咩方法可以切到啲豆腐齊整啲....都係靠隻手夠定...同埋練習多啲啦 ~

蟹肉釀焗蘑菇

接住上個月介紹的忌廉蟹肉醬, 今日好想分享哩個蟹肉釀焗蘑菇，實不相瞞....係用同一罐蟹肉做的(唔係罐蟹肉放咗幾個禮拜, 只係未有時間出食譜啫)。平時做焗蘑菇，我通常會加少少薯蓉做餡，不過今次特別啲，想突出蟹肉味，所以餡料主要用咗蟹肉。哩個小食用o既蟹肉唔多，最啱係蒸蟹食淨一兩隻蟹腳，或者好似我上次咁，用開咗一罐又用唔哂啲蟹肉來做。

忌廉蟹肉醬

好似又有一段時間冇出食譜....係時候由山洞走返出來喇 ~
下個禮拜又放紅日，最啱搞大食會，今日就介紹個派對小食啦。哩個醬可以配焗脆咗o既麵包邊，蔬菜(紅蘿蔔或西芹)條又或者塗上餅乾都可以，幾百搭。其實平時我最鍾意配西芹，不過咁啱食淨咗啲麵包邊, 環保啲，唔好嘥麻~

今次我選用咗罐裝蟹肉，主要都係因為方便啲。當然，亦可以買隻蟹返來蒸，雪凍再拆肉....不過連出食譜都冇時間出o既我，最終都係用現成野。話時話，罐頭蟹肉唔算貴，味道都唔錯，大家可以考慮吓。

魷魚帶子沙律

海鮮當中，真係冇乜邊樣我唔鍾意食。早兩個禮拜同朋友食飯，叫咗哩個魷魚沙律，味道唔錯喎，咁好食，梗係要自己試吓整啦。今次用咗一個簡單的醋汁，只要將海鮮灼熟後，再撈個汁放入雪櫃冷藏就大功告成(當然，要再放多一頭半個鐘先夠入味)。不過重點係，由開始整到完成，所需時間不多，啱哂我哩啲大忙人~

焗脆薯片

好野, 哩個幾禮拜開涼返，又可以入廚房煮野。已經諗咗一系列想整o既菜色，研究成功就同大家分享啦。今日哩個焗薯片係我近期較鍾意o既食譜之一 (其一，因為我係薯仔怪...其二，係因為佢外脆內軟)，唔係賣花讚花香，真係好好食架。食西餐，唔食焗薯可以試吓配哩個，包你食過返尋味~ 睇相都知，雖然個薯仔切成一片片，不過每片都冇切到底，所以望落去好似一個長長薯仔的形。

茄子脆脆

尋日介紹咗涼伴茄子，今日介紹埋佢個朋友，茄子脆脆。 成日喺西餐廳都會見到，幾條都要收幾十蚊，但同焗薯片一樣，成本好平仲要好易做。今次我整哩個係"少辣"，大家可應個人喜好而調整辣味。 雖然哩個通常係頭盤，但係其實亦可以當餸食 (可以配泰式甜辣醬，好正架 !)。

好多時喺街食到o既茄子條都係炸o既，其實用焗爐都可以做到好脆o既效果，唔一定用油炸先好味。大家不防試吓哩個健康啲o既方法。

涼拌茄子

嘿嘿, 尋晚整定o既小食，睇奧運唔一定食薯片 =p
話說哩碟茄子，影咗成十幾張相都冇辦法影到佢好靚仔...因為啲茄子太深色喇...用傻瓜機o既我...只係影到個黑影。所以，最終灑咗啲芝麻上去，影出來效果即時好咗，而最意想不到o既，就係原來都幾好食 (小貼士: 芝麻最好用白鑊炒一炒，食時會更香口)

泰式燒豬頸肉

哩排公司真係比較忙，多數都係煮啲懶人餐。今晚煮o既係泰式燒豬頸肉。哩個醃法，可以用來bbq都ok，不過我通常都係放入焗爐，只要前一晚醃定，又唔洗睇火，方便得很。材料並不難搵，唯獨係青檸葉，新鮮的比較難買，喺啲南亞雜貨舖會搵到，不過我改用乾的(喺某某鬼佬超市買到)，效果當然冇咁好，不過都算係交到工課。另外一提，就係個蘸汁，因為我唔食得辣，所以用咗泰式甜辣椒醬代替辣椒粉，哩個可按個人口味調教啦。

焗釀蘑菇