蘑菇扒脆脆豆腐

豆腐，蒸炒煮炸皆可，是我近期最喜歡的食材之一。事緣婚後老公想食得健康點，而早午兩餐通常都是多肉少菜，所以現在晚飯我們實行多菜少肉，感覺上較容易消化。

今次選用了布包豆腐，口感嫩滑之餘煎時亦不易散。有朋友問到，煎豆腐有何秘訣，其實除了落適量的油，最重要是用廚房紙印乾表面。

日式凍豆腐

好多時食日本菜都會叫哩個凍豆腐，原來做法好簡單，用的都係一般日本菜會用到的醬料。如果想口感同味道豐富啲可以加少少目魚碎，加唔加都得。我覺得做哩個前菜最難o既地方就係要將啲豆腐切到正正方方(為咗令啲豆腐靚仔啲，啲邊邊都切走哂...為免浪費我通當會攞啲邊位去其他餸或味噌湯)。至於有咩方法可以切到啲豆腐齊整啲....都係靠隻手夠定...同埋練習多啲啦 ~

茄子粒肉鬆扒豆腐

好開心呀~ 前兩日行街市...第一次見到泰式茄子 ! 哈哈，為食o既我，當然第一時間買咗來試煮啦! 第一次煮泰式茄子，原來佢好硬架，同平時o既長身茄子有啲分別，烹調時間都比較長 (要煮最少10分鐘先開始變腍)。 哩個新嘗試o既口感都幾唔錯，如果你地有機會買到，不防試吓 ~

味噌豚肉蒸豆腐

之前喺日式超市買咗一盒新鮮味噌整麵豉湯。不過，飲咗好多次仲剩下好大盒，唯有諗啲食譜用埋佢。今日哩個我特別鍾意 (因為連個名都好日式 =p)。而做法亦都唔難，準備時間只需十分鐘，蒸又係十分鐘，加埋20分鐘有得食 ! 

魚柳蒸豆腐

哩個，實在係冇乜難度o既餸。想食得清清地，哩個係一個唔錯o既選擇;由準備到食得，只係20分鐘(手腳慢o既,都係25分鐘)。其實哩個餸有另一好處，就係唔一定用新鮮材料(一睇就知我係用咗盒裝豆腐)，而魚柳，就係冰鮮魚柳，唔得閒去買餸都唔洗驚冇得食~

豆腐 1磚
凍鮮魚柳 1條


鹽 1/2茶匙
古月粉 1/2茶匙

雞粉 1茶匙
糖 1/4茶匙
生粉 1茶匙
水 約3/4杯

1.魚柳解凍後切成件，再用鹽及古月粉略醃
2.豆腐切成件，排在碟上，再放上魚柳
3.以大火，蒸約12分鐘，至魚柳熟透，取出，瀝去多餘水份
4.將調味混合，加熱成茨，淋上即可

肉丸豆腐

早排行宜家嗰時又忍唔住買咗包肉丸，真係百食不厭。不過，我之前食，差唔多每次都係配薯仔或者意粉，所以今次想搞啲新意思，試吓來煮餸。因為肉丸比較濃味同埋口感較腍，所以揀咗豆腐去配。


要令到個餸有新鮮感，當然醬汁都唔可以用返平時o既啲，今次大膽咁用返宜家啲果醬去做個汁，配肉丸當然一流，原來，夾埋豆腐個味都唔錯架。幾滿意今次哩個實驗品 =)

肉丸  8-10柆
硬豆腐  1磚,切成細塊
鹽  1/2茶匙


果醬  4湯匙
水 1湯匙
鹽  1/4茶匙

1. 豆腐切成細塊後，用鹽略醃，讓豆腐滲出水份後用廚房紙印乾，備用
2. 肉丸可用焗爐或鍋裡加熱，盛起切半
3. 豆腐以中火煎至金黃，上碟
4. 將肉丸放在豆腐上
5. 以中慢火將果醬、水及鹽加熱，淋上肉丸即成

紅莧菜豆腐湯

滾湯，我通常會用硬豆腐。除咗因為冇咁容易"滾爛"之外，另一個原因係因為硬豆腐含鈣量較高。聽聞約30歲左右，身體就會停止生產鈣，若果每日攝取量不足的話，身體就會由體內"鈣儲備"到取出你身體所需 (即係平時電視廣告話體內的鈣會隨年紀流失的原因)。所以我會盡量喺唔同地方吸收多啲鈣，希望老來唔會有骨質疏鬆啦~

紅莧菜  1札
硬豆腐  1磚
排骨  約350克
咸蛋  1隻
鹽  少許

1. 水滾後，加入排骨，轉細火煲約30分鐘
2. 加入咸蛋黃及豆腐，再煲約15分鐘
3. 豆腐盛起，轉大火，加入紅莧菜(先加莖，後加葉)
4. 最後，可轉回中慢火，加入咸蛋白(切勿攪動太多)
5. 蛋白熟透即成(可加少許鹽調味)

雜菌扒豆腐

唔知點解，哩排超市好多菇菇賣。外國菇、中國菇、韓國菇、日本菇，真係唔知點揀 @_@。因為之前食咗太多肉，所以想食得素啲。今次哩個餸用咗三款菇，其實用咩菇都得，不過我特登用咗三種唔好口感o既菇，令口感豐啲。另外，若果家裡冇鮑汁，可用蠔油代替。

硬豆腐 2塊
草菇 約150克,切半
本菇 約150克
金菇 約150克
蒜蓉 1/2茶匙

鮑汁 3湯匙
水 6湯匙
生粉 2茶匙

1.硬豆腐先切成片(約半寸厚)，用少許鹽醃約30分鐘(豆腐出水後，用廚房紙印乾)
2.以中火，煎香豆腐的兩面至金黃。排在碟上備用
3.爆香蒜蓉，再加入菇類，炒至金菇軟身
4.將調味混合，再加入菇裡加熱，煮至汁變稠即可淋在豆腐上

冰豆腐紫菜湯

似過食海棉未? 食冰豆腐就好似食海棉咁，最適合就係煮炆餸或煲湯，因為吸收湯後，一咬就成口汁，正 !~ 製作非常簡單，只要之前一晚將豆腐放入冰箱，第二日攞出來，豆腐個質感就會唔同咗。


至於紫菜，唔係用我地平時零食o既紫菜，係用買煲湯/煮飯嗰隻，唔好搞錯呢 =)

豆腐 1磚,切片
紫菜 1片
生菜 1棵,切段
肉片 約200克
鹽 1/2茶匙
生粉 1/2茶匙
上湯 500毫升

1.豆腐要前一晚放入冰箱(用前約1-2小時取出解凍方能切片)
2.肉片先用鹽及生粉醃15分鐘
3.紫菜先用水浸開，小心洗清沙石
4.上湯以大火滾起，加入肉片，待滾後再順序豆腐、紫菜及生菜，湯再滾起即成

老少平安

第一次聽哩個餸名，諗極都諗唔到係用咩材料做。後來先知，原來係鯪魚滑同豆腐。因為又冇骨又軟棉棉o既關係，無論係老人家定係小朋友，都食得好安心同好開心。最好o既地方，係製作簡單，又比較難"蒸老咗"，絕對係一個"入門菜色"，不妨試試~


今次為咗影相靚仔啲，我加咗小小蝦米入去，當然，味道都會香啲，不過，其實唔加都一樣咁好味。調味方面，我用咗比較淡味o既豉油，主要係加小小色，令到個餸望落去冇咁單調。因為鯪魚肉本身已經夠哂味，所以想食得淡啲的話，唔加都可以。

豆腐 1磚
鯪魚滑 約200克(同豆腐同等份量)
蝦米 約1湯匙,浸軟後切碎

生抽 1湯匙
糖 1/4茶匙
水 1湯匙

1. 鯪魚滑先於碗內攪鬆(攪鬆後先與豆腐混合，能更快拌勻)
2. 加入豆腐與蝦米，所有材料盡量以最少動作次數拌勻(攪得太多會令豆腐太碎，影響口感)
3.以大火，蒸約12-15分鐘後取出，小心倒出多餘水份
4.所有調味拌勻，以慢火加熱後淋上豆腐面即可

煎釀豆腐

豆腐，豆味香濃，但本身冇味，勝在配搭百變。其中一個最受歡迎o既煮法當然係釀豆腐。前兩日想食啲香口野，所以做煎釀豆腐。我特別鍾意個肉，因為用咗幾種材料混合，口感唔錯。為增添香味，我加咗蝦米同蔥入啲肉到，想慳工夫的話，可買市面上己混合蔥和蝦米的鯪魚滑。

硬豆腐 1塊
鯪魚滑 約100克
免治豬肉 約100克
蝦米 1湯匙
蔥 1湯匙
生粉 約2湯匙

生抽 2湯匙
鎮江醋 1/2湯匙
泰式甜辣醬 1湯匙

1.豆腐先切件，灑上少許鹽，約15-20後，豆腐會滲出水份，用廚房紙印乾即可(小貼士:若豆腐沒有印乾水，煎時會出水，表面就唔脆)
2.鯪魚滑、豬肉、蝦米及蔥混合成餡備用
3.豆腐的其中一面撲上生粉，再釀入薄薄的餡料(見圖)

4.以中火，煎至豆腐4面金黃即可盛起
5.醬所有調味混合(可淋上豆腐上，或用作蘸醬)

風味豆腐

其實哩個豆腐已經係幾晚之前o既餸，不過諗咗好耐都未諗到個豆腐叫咩名，所以仲未post。最終，都係求其叫佢"風味"就算，至於係咩風味，就留俾大家諗吓啦。

布包豆腐 1磚
瑤柱 1粒,浸軟
蝦米 約2湯匙,浸軟
冬姑 4隻,浸軟後切粒
蔥 1棵,切粒

豉油 3湯匙
水 2湯匙
糖 1茶匙
蔴油 隨意

1. 豆腐沖水後切成約0.5厘米厚(小貼士:將整磚豆腐切好，移上碟上才以輕力扇開)

2. 於豆腐面灑上少許鹽，再用大火蒸10分鐘，取出，小心隔去多餘少份，備用
3. 瑤柱撕成絲後，可用與蝦米及冬菇以細火爆香
4. 加入調味料，煮滾後淋在豆腐上，再灑上蔥花即可