台式肉燥配藜麥菜飯

簡易台式肉燥超下飯, 記住煮多啲飯哦 ~

黑椒洋蔥豬扒

這道菜其實不算難，不過要煮得好食，就要花少少時間。由醃肉到完成，最快都要一小時，當然，醃肉時間越長，豬扒就會越入味。我覺得整個餸的主角就是洋蔥，煮腍了的洋蔥吸收了豬扒的肉汁，實在太好味。雖然洋蔥是主角，不過豬扒亦不能忽視，我選用了梅頭豬扒，肉質會較腍。只要火候控制得好，不要將豬扒煮到過熟，豬肉就不會實，關鍵是洋蔥和豬扒要分開煮。

麻辣蒜泥白肉

早兩天有朋友送了一樽麻辣醬給我，原本是想用來煮老公最愛的雞煲，不過因為每天都夜放工，沒有時間打邊爐，最終晚餐都是簡單煮了幾味。

以往煮蒜泥白肉都是用五花腩，今次為了慳時間，特別轉用了豬肉片，烹調時間由30分鐘變成30秒。整個餸比較花時間的步驟應該是將青瓜和豬肉卷起，不過是沒有特別技巧的動作，就算是新手都沒有難度，不過看起來個餸就精緻好多。

焗豬扒飯

香港物價貴租又貴，今時今日去茶餐廳食飯，一個set 都要 $40-50，而重點，碟頭還要比以前細。有時情願在家中煮即食麵都不願落街食飯。沒有去茶記一段時間，最掛住焗豬扒飯，其實在家亦可以做到茶記的味道，雖然步驟多，但唔算難。

焗飯當然要配炒飯底，不過如果想慳時間，用白飯亦可 。有睇 <食神> 都知，炒飯一定要用冷飯，不過若果沒有的話亦可即時煮(煮時用九成水，讓飯可較乾身) 。至於將汁，可視乎個人喜好控制稀稠，我喜歡較稠的醬汁，所以只落了 1杯雞湯。若果喜歡較稀的茄汁醬，可落1 1/4杯，不過始終是焗飯，不建議煮到醬汁太稀，否則焗時飯會吸收汁的水份，令到飯底發脹變腍。

至於芝士，我用了mozarella 同 parmesan (mozarella 可做到一絲絲的效果，parmesan 焗起有點脆面，好香口)。最後要提一提，豬扒煎好後最好切成條再放回飯面，食時會較方便。今次醬汁比較濃，所以只要用質素較高的冰鮮豬扒就可以。

Sadia 有骨豬扒 2塊

麵粉  少許

(豬扒醃料)

生抽  1湯匙

糖 1/2 茶匙

黑胡椒粉 1/4茶匙

(飯底)

蛋 2 隻, 打散

蒜蓉 1/2茶匙

冷飯 2 碗

(醬汁)

蒜蓉 1茶匙

洋蔥 1/2個, 切條

番茄 2個, 切件

茄膏 2湯匙

雞湯 1 - 1 1/4杯

麵粉  2湯匙

鹽/糖/黑椒  各1/4茶匙

水牛芝士/巴馬臣芝士  各1/4杯

1. 醃料混合後醃豬扒最少30分鐘，期間可準備其他材料

2. (炒飯底)用少許油，炒香蒜蓉，加入冷飯，炒熱後加入蛋炒香，盛起，放在焗盤備用

3. (醬汁) 先爆香洋蔥和蒜蓉，加入蕃茄和茄膏再炒2-3分鐘

4. 麵粉和雞湯混合後倒入蕃加裡，用鹽/糖/黑椒調味，煮至醬汁變稠，盛起備用

5. 在已醃好的豬扒上撲麵粉，用高火煎香兩面至金黃，放在炒飯上 (豬扒可切件)

6. 淋上茄醬，再灑上芝士碎，在預熱230度焗爐裡焗 15分鐘，至芝士表面金面即可

吉列豬柳扒配日式咖哩醬

夏日炎炎，胃口不佳，總是愛吃香辣的餸菜。日式咖哩是我的首選，只要爆香材料，加入咖哩磚，再煮一會便可。麻煩的反而是準備炸豬排，雖然材料簡單，不過製作步驟多。要做到香脆好味的炸豬扒不能懶，除了豬扒外，麵粉和日式麵包糠都要調味。最基本可以用鹽和黑椒調味，想更好味，可以試用香草和其他香料。

最近愛上了Sadia 的細細塊豬柳扒，一啖一塊，排常方便。有時間的話可以隔晚由冰箱取出放入雪櫃解凍，早上返工前調味，讓醃料有足夠時間入味，效果會更佳。今次的豬扒是半煎炸的 (我都是怕廚房油煙多)，當然若果不介意油煙多，炸會比半煎炸更酥脆。

香茅豬梅扒

結婚差不多兩個月，仍然在適應新婚生活。現在每晚煮飯除了煮些自已喜歡食的，時不時要哄哄老公仔，老公喜歡越泰菜，所以近日經常煮。說起越南菜，一定會想起香茅豬扒。

要煮好香茅豬扒除了要選用靚魚露還要選用靚豬肉。今次特別選用進口的Sadia 豬梅肉扒，肉質鬆軟，早上出街前醃好，放工就可以煎，非常方便。如果想令豬扒更香，可以煎到中途加入醃料的香茅和蒜蓉 (太早加會很容易燒焦)，香味會即時提升。而整個烹調過程最重要的程序，是盛起豬排後，用鑊的餘溫將蔥花略略加熱與肉汁拌勻淋上豬排上，這樣可以除去蔥的青味，亦不會浪費非常惹味的豬肉汁。

泰式炒河 (pad thai)

泰式炒河最好玩就是煎蛋網。事實上製作蛋網並不難，只要將蛋漿放入唧樽再"唧"出來煎即可，不過完成後成功感特別大，感覺超良好，因為未食入口已經覺得自己做到餐廳的水準 =P 話雖如此，即使我成日出入廚房，第一次煎蛋網都是失敗的(因為太貪心，唧得太多蛋漿，令網變成"餅")。所以，若果第一次失敗的話，請勿傷心，再試多兩隻蛋就一定成功 !





後記: 心水清的讀者會發覺食譜內有花生碎，為何相內找不到花生呢? 
事關小妹完成蛋網後實在太興奮，一時忘記了 =P

葡國辣肉腸蕃茄意粉

澳門手信，你會諗到買咩呢 ? 豬肉乾，杏仁餅? 最近同朋友去澳門一天遊，佢介紹咗一樣幾特別o既手信，叫我一定要買...就係葡國辣肉腸! 點解要喺澳門買返來呢? 原來喺澳門啲雜貨舖買辣肉腸好平，平時喺香港啲超市到買，一條三四百克的最少都要六七十蚊。大家估下喺澳門雜貨舖買要幾多錢? 只售十九大元 ! 你話咁平係咪要買多幾條返來呢? 唯一有少少麻煩o既就辣肉腸本身要雪住(店主話由葡萄牙返貨嗰時係常溫的....佢話為咗方便先放入雪櫃，即使買回家後唔雪都冇問題)。不過我自己覺得放過入雪櫃o既食物最好都係keep 住雪，所以為咗買手信，我地都改咗行程，去碼頭前最後一刻先買辣肉腸。

哩幾日煮意粉，第一時間就諗到用辣肉腸。其實隨了用來煮意粉，仲可以用辣肉腸來做湯和小食，遲些再出其他食譜啦 =)

***

後記: 我所講的雜貨舖其實是雀仔園街市對面的一間小店 - 其實去到雀仔園街市, 最緊要是食 ! 有80年代的茶樓(細細間的)、街邊檔有炭燒豬扒包、腸粉、蒸糕點和茶粿。值得一去。如果是坐的士去的話，可以同師傅講是皇都酒店附近，落車行一兩條街就到。

蜜汁豬扒配梨蓉醬

哩個餸係早排較熱嗰時煮的，諗住加啲生果入去煮，感覺會清新啲，胃口都好啲。蜜汁配啤梨，本身味道較甜，所以我加咗少少蘋果醋落個汁到，令到佢味道甜得來有少少帶酸。可以令個汁味道較豐富之餘亦有助增強食欲~

另外，今次選用的豬扒較薄身，所以唔洗揼鬆，煎到熟就可以盛起，口感較爽。

茄子粒肉鬆扒豆腐

好開心呀~ 前兩日行街市...第一次見到泰式茄子 ! 哈哈，為食o既我，當然第一時間買咗來試煮啦! 第一次煮泰式茄子，原來佢好硬架，同平時o既長身茄子有啲分別，烹調時間都比較長 (要煮最少10分鐘先開始變腍)。 哩個新嘗試o既口感都幾唔錯，如果你地有機會買到，不防試吓 ~

味噌豚肉蒸豆腐

之前喺日式超市買咗一盒新鮮味噌整麵豉湯。不過，飲咗好多次仲剩下好大盒，唯有諗啲食譜用埋佢。今日哩個我特別鍾意 (因為連個名都好日式 =p)。而做法亦都唔難，準備時間只需十分鐘，蒸又係十分鐘，加埋20分鐘有得食 ! 

香茅豬扒

以前想買香茅，就一定要去啲南亞雜貨舖先搵到。可惜我屋苑個街市冇，要買好麻煩...不過，哩排有幾間超市都有得買。上個禮拜買咗一包，十蚊八蚊就有七八支香芧，用淨咗仲可以放喺睡房到做天然香薰，一物二用 =)


香茅外皮比較硬，外皮(最外面的一至二層)我通常會用小杯插起做香薰，入面會切成薄片煮野食。若果不去外皮，會較難切片。不過內外一樣香，去唔去皮視乎個人喜好啦。

水牛芝士波配香草豬扒包

豬扒包明明係中式....加咗舊水牛芝士，哈哈，唔中唔西，都唔知搞乜。不過我成日都覺得唔緊要啦，中英法日俄，最緊要好食呀麻! 如果想豬扒鬆啲，最好係揼吓佢先醃。 今次係我第一次成塊水牛芝士咁放入焗爐焗，個效果好正呀，一咬入去一撕，好長o既芝士絲，嘿嘿~

焗蕃茄肉醬意粉

好多時街買到o既焗意粉醬或者喺餐廳食到o既啲都係用牛肉做材料。不過因為牛肉比較燥，所以如果係自家製的話通常都會揀用豬，雖然味道會冇咁濃，不過健康啲好。其實好多朋友都會笑我點解連意粉醬都要自家製，原因除咗味道可自己控制外亦何以話係食得健康啲(因為少啲防腐劑同味精麻)。 今次做哩個醬材料唔多，反而香料多，如果喺街買，哩個會係italian herbs 口味。

泰式燒豬頸肉

哩排公司真係比較忙，多數都係煮啲懶人餐。今晚煮o既係泰式燒豬頸肉。哩個醃法，可以用來bbq都ok，不過我通常都係放入焗爐，只要前一晚醃定，又唔洗睇火，方便得很。材料並不難搵，唯獨係青檸葉，新鮮的比較難買，喺啲南亞雜貨舖會搵到，不過我改用乾的(喺某某鬼佬超市買到)，效果當然冇咁好，不過都算係交到工課。另外一提，就係個蘸汁，因為我唔食得辣，所以用咗泰式甜辣椒醬代替辣椒粉，哩個可按個人口味調教啦。

冬菇馬蹄蒸肉餅

鍾意食爽口o既野，所以好鍾意食馬蹄。我食肉餅，鍾意多餸，由相可見，真係餸會多過肉。另外，肉餅我比較鍾意口感腍小小，只要調味時加入一兩匙水，肉餅蒸好就唔會咁硬。因為冬菇同馬蹄本身都冇味，今次特別用咗老抽，提昇香味。

柚香豬皮爽

整燻蹄，一定會剩返啲頭頭尾尾做唔到一塊完整o既燻蹄。為咗唔浪費食物，所以諗吓有咩食法可以令佢變成另一個菜色。不過有個難度就係啲豬皮全部都三尖八角，唯有將啲豬皮再切細塊啲。六小碟放埋一齊，最理想就係每款都有唔同o既口感同味道;為令豬皮爽o既味度特別突出，今次試用甜o既汁料，雖然好小前菜會用甜o既配汁，不過同埋另外幾個前菜一拼食，效果又真係幾好~

燻蹄

講起中式頭盤，好多人第一時間就會諗起燻蹄。今次第一次整，都唔敢抱太大期望，點知整落，原來都唔算太難，只要每個步驟"做到足"，就一定整得成 =)

榨菜肉丸

平時整榨菜同豬肉，總係將啲豬肉切成絲或片，然後炒或蒸。唔知點解，突然會諗到整成丸形。效果比想像中好，因為起切驚蒸完或者夾起時會散開，結果粒肉丸好乖，由夾起到放入口都好完整。

海苔豚肉卷

哩個卷，材料簡單，但係真係食到停唔到口。我哩個份量做到約10件(每個抓餅可做約5件)，因為我每次都會做約4-5個小食，所以每個小食份量都唔會做太多。哩個卷製作時間短，最佳係暖食，所以最好係等賓客到齊先做 =)