柑橘沙律

大食會往往都是肉多菜少，所以我好喜歡做沙律，因為容易準備且可以令朋友吃得健康點。最簡單的當然是買包"mixed greens" 或 火箭菜(想加誠意分可加幾片蕃茄和紅蘿蔔絲)，淋上日式芝麻沙律醬，整個過程10分鐘內可完成。想pro一點則可以買兩顆羅馬生菜加一包 "caesar salad kit"，有齊麵包粒，煙肉粒，芝士碎同醬汁，洗菜後一混合即可以食。但係如果想突出少少，就一定要花點心思。以下介紹的柑橘沙律，做法簡單，顏色鮮艷，食後感覺清新，而最主要，是做法簡單 (連切橙都是20分鐘完成)。

今次我用了橙、西柚和韓國柑(較中國柑清甜)，其實亦可選用其他柑橘類生果(見過有食譜用檸檬，不過我覺得太酸了)，最緊要是顏色要有點不同，砌出來效果先夠搶眼。至於沙律汁方面，我加了一點蜜糖，因為橙和西柚本身帶點酸味，要加一點甜味平衡一下。

韓式菠菜沙律

菠菜沙律，係每次韓燒前一定會食o既前菜其中一碟。比起泡菜同其他"小碟"，菠菜沙律o既製作時間短好多，只需幾分鐘就完成。有時喺家中宴客，想喺準備飯餸時有啲野俾朋友食，除咗拍青瓜或海蜇之外，哩個都係一個好選擇。

今次我係用咗韓式醬油，如果屋企冇的話，我曾經試過用生抽加少少糖都可以。味道當然冇咁地道啦，但係都呃到人架 ~

田園焗蛋餅

我地中國人食蛋，一般都係蒸、炒或煎。我近期喜歡了焗。聽聞焗蛋是源自意大利，煮法大概分兩種; 先煎後焗或"全程焗"。因為家中的焗爐較細，所以唯有選用方法二，即係將蛋漿直接焗熟。雖然所需時間較先煎後焗的方法耐，但係冇所謂啦~

焗蛋餅可當早餐、午餐或晚餐(夜晚食時可做餸)，今次我選用了素菜做主角，但係亦可根據個人喜好加唔同o既肉類。

海鮮炒西芹

我諗今日係全年最熱o既一日...晏晝出去食飯有成33度，到夜晚煮飯嗰時都成28度。真係熱到唔想煮飯 @@ 估唔到至係五月頭，已經熱到好似七月咁~  同往年一樣，天氣熱我通常都會煮啲"快熟"o既餸。今日推介，由洗到切到炒，至係20分鐘完成的海鮮炒西芹，掂 ! (今日選用急凍海鮮 ...想加速解凍時間，可隔住保鮮袋沖凍水，用熱水/暖水的話會煮熟海鮮 ! )

椒絲腐乳通

每次去到大排檔，除咗必定叫o既豉椒炒蜆外，就一定要叫哩個餸。只因為大排檔炒得比較有鑊氣，香口好多。有時想食得清啲，就會灼咗啲通菜之後整個腐乳醬淋上去，不過，我都係天生鍾意食煎炸同香口野，始終覺得炒過好食啲。視乎你個人口味，我本身唔食得太辣，所以辣椒一定要去籽，喜歡辣o既朋友，就落多啲都唔怕=p

香草牛油炒豆苗

菜價高企，尋日啲豆苗竟然只賣$8/半斤，咁平，冇理由唔食架。豆苗本身有一種菜青味，唔係每樣材料都夾得到。豆苗的好朋友可算是蒜蓉，其實我選用自家製的香草牛油炒豆苗，一，係想嘗試用一個較西式的煮法。二，係想試吓豆苗夾吓其它味道。個效果都唔錯，目標一同二都成功 ! 至於味邊方面，因為用咗香草，食嗰時，都有小小西餐feel~

腐皮卷燴小白菜

之前介紹過o既素炸腐皮卷除咗炸，其實仲可以炆。炆完先食，會冇咁熱氣=) 不過為免炆時腐皮卷會散開，最好都係炆前炸一炸。 雖然製作腐皮卷o既時間唔長，但係如果大家懶o既話，買現成o既腐皮卷一樣可以～

雲耳浸勝瓜

好簡單一個餸又唔需要太多準備工夫。季尾喇，過多個幾月就冇勝瓜，快啲食多兩次先~
其實好多人做哩個餸會用百合...但係我自己又唔係特別鍾意，所以用咗洋蔥。

忌廉莧菜

莧菜好多時都會用上湯浸或煮金銀蛋，今次試用西式煮法，味道唔錯。我特別鍾意粉紫色汁，好靚 =) 哩個餸好方便，冇咩技效，最適合初入廚的朋友~ 喜歡濃味小小的朋友可以加小小鹽同糖，不過我自己覺得忌廉湯的味道已經夠濃，唔需要再加其他調味。

忌廉湯 1罐
紅莧菜 1朼
蒜 2粒,切片

1.先用少量油爆香蒜片
2.加入莧菜，炒至菜開始軟身
3.加入忌廉湯(完罐,不用開水)，煮至菜完全軟身即可