無糖香蕉蛋糕 (BB版)

最近家中添置了一個小焗爐。主要用途都是為女兒焗少糖又無添加的蛋糕和麵包。現在小女22個月了，遇到新事物都感到非常好奇，像海棉一樣，吸收新智識和觀察能力都非常厲害。上星期只是用了焗爐焗小蛋糕一次，早兩天起床，她就不斷指向焗爐，示意要食蛋糕。現在的小孩子, 真懂得為自己爭取福利。

早兩天焗的是無糖香蕉蛋糕，口感鬆軟，且材料和步驟都很簡單，30分鐘就完成。順便一提，小蛋糕沒有加糖，所以挑選香蕉時必定要揀較熟的，因熟蕉會較甜，香蕉味亦較濃，若果選用了較生的香蕉，蛋糕就會欠缺香味和甜味。蛋糕無添加任何糖份或香料，12個月或以上的BB都可以食 (因用了全蛋，要注意寶寶是否對蛋白敏感)。

另外, 為了方便女兒食用，今次我用了超細的(1")蛋糕紙杯，所以烘焙時間較短，若果用正常的2"馬芬杯，烘焙時間大約要18-20分鐘。

鬆軟熱香餅

超鬆軟的熱香餅，其實不用在餐廳食，在家也可以輕易做到。做法和普通pancake 差不多，重點是先將蛋白用打蛋器打至企身再與其他材料混合。另外要注意的就是pan 的溫度，過熱的話pancake 會澎漲得很快，不過一離鑊時亦很快萎縮。所以第一次整，大家要試試自己的爐應用什麼火力 (我家是用電磁爐的，有9段火力，用2度火就剛剛好)。

合桃糊

上一次簡介了Bosch VitaBoost的基本功能，今次講detail少少、順道分享多幾張靚相。

攪拌器配備耐用2 公升Tritan™耐溫塑膠攪拌杯，不含BPA，冷熱食物都可安心使用，容量大，可以一次過處理大量食材。

攪拌器操作簡單，除了六個預設攪拌模式，還可以自行調教轉速，用Pulse 功能可以按需要控制攪拌時間。

六大自動模式包括:  奶昔 (20秒)、沙冰 (50秒)、熱湯(5.5分鐘)、醬料 (25秒)、雪糕 / 雪葩 (55秒)及清潔模式。

1600Ｗ強效馬力加上６葉不鏽鋼刀片，大大縮短食材處理時間。每分鐘可切割食物180,000次，連整條魚或龍蝦殼都可以打碎(過篩不會有魚骨)。

只需短短10秒 (用pulse 模式)，就可以將冰糖完全打成糖粉。

配備攪拌棒，攪拌時有助將葉菜類食物推下攪拌。

隨機附送一本精美食譜書，內有30個健康食譜，教你使用5 個攪拌模式。另外，亦可安裝Bosch攪拌機系列的app - VitaBar²，按您喜歡的蔬果選擇，為您設計健康飲品。

早兩晚餵完夜奶，突然想食甜品，用熱湯模式打合桃糊，室溫材料直接放入攪拌杯，連預備時間，15分鐘內做出香噴噴的命合桃糊，快過落街買。

棉花糖芝士蛋糕

天氣開始涼, 又係BBQ季節喇~ 燒野食又點少得棉花糖呢? 咁多年燒野食都係買經典美國棉花糖品牌Rocky Mountain，質感輕盈，口感獨特，將佢慢烘到外脆內軟，諗起都想食。 不過大家又知唔知棉花糖除咗燒烤仲有好多食法架。

前兩日突然手痕想整甜品，咁啱屋企有半包燒野食淨落嘅棉花糖，就諗到整老公最愛嘅芝士蛋糕，哩個免焗版只需30分鐘就完成，哄咗個女訓覺就開工，餵完半夜支奶就有得食喇。

蝴蝶酥

近兩星期都為準備過年的大小事而忙。除了蒸蘿蔔糕、芋頭糕、桂花糕今年我打算做一些較新潮的甜品。蝴蝶酥簡單易做，如果用現成酥皮，製作時間只需約30分鐘，是不二之選。用現成酥皮要注意室溫，因為酥皮是由一層層的牛油重疊而成，若置室溫太久，牛油會溶而導致酥皮失去層次感。我選用的是已壓好的酥皮(不是一大磚那款)，由冰格取出後置室溫約5分鐘就可以用。

至於糖，可以考慮用粗糖粒灑面，焗後糖不會完全溶掉，外觀較美。不過若果家中沒有粗糖粒又懶買的話，亦可用幼砂糖代替。另外需要注意就是將酥皮放在焗盤時，每塊要隔開最少兩吋，因為蝴蝶酥會"自我澎漲" 兩至三倍，若放得太近，蝴蝶酥會與"鄰居" 變成連體嬰。

櫻花cupcake

快到小妹的大日子，還有許多瑣碎事情要處理。百忙之中，還是要留點時間入廚。壓力大的時候，食甜品能讓人放鬆心情，所以做了幾個cupcake。其實原本計劃大日子時親手做cupcake 做回禮之用，最終被朋友勸阻了 =P 現在只會做小量給長輩和兄弟姊妹當早餐。

今次用了來自日木的櫻花雞蛋，雞黃色澤金黃且蛋味香濃，是做cupcake 的好拍檔。

蛋糕底
櫻花蛋雞 3 隻
砂糖             1/2杯
牛油 (室溫) 60 克 
低筋麵粉    1 1/2 杯
泡打粉  1 1/2茶匙
雲尼拿香油  1  茶匙
鹽  1/4茶匙
奶  1/4杯

buttercream
牛油  150克
糖霜  300克
奶  2湯匙
粉紅色及紫色食物色素  少許 

蛋糕底
1. 用打蛋器將糖和牛油打至牛油變輕盈和淡黃色
2. 分三次加入櫻花蛋，每次攪勻才加下一隻
3. 拌入雲尼拿香油
4. 將麵粉、泡打粉和鹽過篩備用
5. 先將1/3 麵粉加入牛油裡打勻，然後梅花間竹地將奶和其餘的麵粉打入牛油裡
6. 將蛋漿倒入紙杯裡 (約2/3滿)
7. 預熱焗爐，用170°C焗17-20分鐘 ，取出後待涼便可唧花

buttercream
1. 用打蛋器把牛油打至輕盈
2. 逐少加入糖霜拌勻，再加奶，打3-4分鐘
3. 打入少許色素 (約3滴粉紅和1滴紫色)
4. 將buttercream 放入唧袋，用水滴形唧咀唧出櫻花圖案即成

桂花梨子

<自家二人浪漫 5 course dinner> 之甜品


要為完美的一餐劃上句號，甜品是非常重要。因為已經食了四道菜，所以甜品一定要輕盈，我選擇了讓生果當主角。最省功夫的做法必定是切一碟生果盤，不過總要花點心思才能讓伴侶覺得你廚藝高超。水煮梨不難做(而且很難出錯)，西式煮法很多時會用紅酒，不過我覺得味道較濃，所以我轉用桂花糖。用桂花糖煮，梨會帶有淡淡的桂花味，感覺"輕"很多。

視乎你個煲的大細，煮梨最緊要是水要蓋過梨，否則梨肉會"半生熟"。

法式焦糖燉蛋 (無火槍做法)

法式焦糖燉蛋是去西餐廳常點的甜品。喜歡入廚但又怕明火的我家裡當然不會有火槍，所以從來都不會自家製作焦糖燉蛋。最近在網上發現一個免火槍的製作方法，原來只要用焗爐的grill setting (或只開上發熱線最大火)，都可以做到火槍的效果。當然，用火槍賣相會較佳，因為可以控制火力的"落點"，容易做到焦糖不同金黃色和有點少少燶的效果，用焗爐的話，焦糖的顏色會較均勻。

至於選材，其實最好是買heavy cream (通常賣進口食品的超市有售，一般超市是沒有的)。因為heavy cream 較whipping cream 的脂肪高，味道和口感會較香滑，不過一分錢一分貨，價錢亦都較貴，所以貪平貪方便，買whipping cream 亦可以。至於用來調味的雲尼拿同樣，當然最佳是用原條雲尼拿豆，但如果怕麻煩，就可以用雲尼拿香油代替，分別....當然是真材實料香好多。另外今次的食譜我用了黃金糖 (golden sugar)，味道會較用砂糖較用砂糖濃。

蕃薯糖水

薑有助驅寒外亦有袪濕的功效。經常都會在中醫的口中說若果個人"太濕" 的話會影響排毒和睡眠質素 (即是瞓十個八個鐘後個人仍然感覺疲累)。近排天氣雖然開始回暖，不過回南天，無論身體內外總是覺得很濕，早兩晚見到街市有靚蕃薯，即時想起蕃薯糖水。

蕃薯糖水最重要是個薑味糖水底，俗語有云 "薑是越老越辣"，所以煮蕃薯糖水，記住要買老薑。跟我們的皮膚一樣，越多紋即是越老，且最好揀選較飽滿的薑較為理想。

聖誕布朗尼

聖誕快樂! 祝大家過一個開心又有"好味"的聖誕節 =)

心形棒棒曲奇

之前為朋友婚禮做的心形棒棒曲奇，襯今日元宵出食譜，係咪好應節呢 ?

杏仁脆餅

唔知點解，一到聖誕，啲外國食譜website就會有好多用杏仁o既食譜。我本身唔係太鍾意杏仁味(macaron除外=)，不過哩個食譜啲杏仁味唔算太重。同埋又容易做(絶對呃到人，以為係貴野同好難整)。因為佢唔係太膩，好適合做飯後甜品。

薑餅人

咁大個女，第一次整薑餅人。原來真係幾好玩=p


個食譜唔算太難(就算平時好少入廚o既朋友，都應該處理得到)。唯獨是傳統的薑餅人食譜要用的材料喺香港比較難搵，所以我自己加加減減之後研製咗一個簡易版。因為製作時間短，哩個食譜可以輕易"大量生產"，適合做來送給朋友做聖誕小禮物。

柚子小蛋糕

 個小豬蛋糕模實在太可愛。今日放假又再整 =) 其實係因為前兩日整嗰時朋友話唔夠柚子味，所以想將個食譜改良小小先出。今日再整，落柚子蜜時重手咗，另外再加咗鮮檸檬皮，香咗好多，好滿意。 材料同做法都唔算太複雜，唯一要注意，就係若果用公仔模o既時候，一定要花小小時間用牛油塗好個模，否則，蛋糕有機會"黐"住唔出來~

低筋麵粉 1 1/2杯
砂糖 2湯匙
黃糖 2湯匙
泡打粉 2 1/2茶匙
鹽 1/4茶匙


蛋漿 3湯匙
奶 3/4杯(置室溫)
牛油(溶) 4湯匙
柚子蜜 4湯匙
檸檬皮碎(zest) 1湯匙

1. 先將所有乾材料過篩後混合(小貼士:泡打粉要與其他材料完全混合，否則焗時，小蛋糕會不規則地發 - 即邊大邊細)
2. 再將所有濕材料混合，加入乾材料內，攪至材料剛剛混合即可(切密過份攪拌)
3. 將粉漿倒入己塗上牛油的蛋糕模裡(約7-8成滿)
4. 用200C，焗約12-15分鐘 (視乎模的大細)，可用牙籤刺入，若取出時沒有黐住粉漿即成

朱古力曲奇

本來以為今個禮拜放兩日假，可以有多啲時間搞吓個blog， 誰不知，放假仲忙過返工，結果連出食譜o既時間都冇=p


今日終於得閒，整咗啲朱古力曲奇。我唔鍾意啲餅太甜，所以張原本3/4杯砂糖減至1/2杯，甜味剛剛好，正~

無鹽牛油 1杯(室溫)
砂糖 1/2杯
黃糖 3/4杯
蛋 2隻
雲尼拿香油 2茶匙
低筋麵粉 2 1/4杯
梳打粉 1茶匙
鹽 1/2茶匙
朱古力粒 1 1/2杯

1.用電動打蛋器，將牛油打至滑身及鬆軟
2.加入砂糖及黃糖，再打至滑身(約2-3分鐘)
3.加入一隻蛋，打勻，再加入第二隻蛋及雲尼拿香油打勻
4.在另外的碗裡，將麵粉、梳打粉、鹽過篩及混合
5.先將麵粉與牛油混合，再加入朱古力粒混合成糰(小貼士: 若粉糰太軟，可先放回雪櫃約30分鐘，免得焗時瀉開)
6.將約1湯匙的份量放在牛油紙上，再用手指輕輕壓平(小貼士:手指沾水，可避免粉糰黏住)至曲奇約1/2寸厚

7.用預熱的375C焗10-15分鐘至表面金黃，取出放在鐡架上待涼即可

紅莓燕麥曲奇

受人所託，上兩個禮拜做咗好多曲奇餅。不過搞到今日先有時間出返個食譜。哩個餅有大量燕麥，牛油同糖亦唔算太多，非常健康。若喜歡較有咬口的話，可用3杯燕麥。另外一提，原本的食譜是用1杯糖，但係我想健康啲，同埋因為紅莓乾本身都有甜味，所以我將糖的份量減至3/4杯，甜味啱啱好。

(可做約40塊)
無鹽牛油 3/4杯(室溫)
黃糖 3/4杯
蛋 1隻
雲尼拿香油 1茶匙
低筋麵粉 3/4杯
梳打粉 1/2茶匙
鹽 1/2茶匙
玉桂粉 1/2茶匙
燕麥 2杯
合桃 1杯,切碎
紅莓乾 1杯,切碎

1.先以350C焗香合桃至金黃(及傳出香味)
2.用電動打蛋器，將牛油及糖打至淡黃色及滑身(約2-3分鐘)
3.加入蛋及雲尼拿香油再打勻
4.在另外的碗裡，將麵粉、梳打粉、鹽、玉桂粉過篩及混合
5.先將麵粉與牛油混合，再加入燕麥、合桃、及紅莓乾加入混合成糰

6.將約1湯匙的份量放在牛油紙上，再用手指輕輕壓平(小貼士:手指沾水，可避免粉糰黏住)至曲奇約1/2寸厚

7.用350C焗12-15分鐘至表面金黃(內面應該仲係軟的)，取出放在鐡架上待涼即可

唧花曲奇

一路以為唧花曲奇鬆化係因為牛油成份高，但係原來係因為打牛油時打咗好多空氣入牛油入面先會鬆化。即是話，假使用同一個食譜，打牛油的時間不同都會做出唔同o既口感。


其實我平時唔係好鍾意"量"食材，因為煮餸都係約莫咁落調味，唔需要好仔細量。但係整蛋糕同曲奇就唔可以咁求其，所有野都要量清楚。所以為咗整哩個曲奇，我特登買咗個磅。不過懶到極點的我，又點會咁神心每次都磅材料呢? 所以，今次麻煩啲，磅完後mark 低咗大約份量，下次可以唔洗用磅，用量杯都得。不過，因為香港天氣較濕，唔同季節整份量可能會差少少。


今次試唧玫瑰型...哈哈...都係要練習多啲呢~

無鹽牛油 100克(室溫)
糖霜 25克(約8茶匙)
麵粉 75克(約8湯匙)
粟粉 25克(約8茶匙)
鹽 1/4茶匙

1. 糖霜先過篩，加入牛油，用電動打蛋器打至滑身，約3-4分鐘[打完後，牛油應該係近奶白色，質感應該似稠的忌廉] (小貼士:哩個係鬆化曲奇的關鍵步驟!)
2. 將麵粉及粟粉過篩，與鹽加入牛油裡，攪拌至勻
3. 麵圑放入唧袋(配合星星唧咀)，唧出曲奇(小貼士:焗時，曲奇有機會化開小小，唧花時最好隔開1吋) 

4. 在預熱180C的焗爐裡，焗約10-12分鐘至表面金黃即可取出(小貼士:焗前放回雪櫃約15分鐘有助減少曲奇化開)

忌廉泡夫

每次經過地鐡站，最怕就係經過賣cream puff o既舖頭，因為每次聞到都已經忍唔住想買。再望多兩眼，見到咁多款唔同選擇，就一定會買個來食。 佢地實在太邪惡喇 !食一個通常係唔夠喉，但係又驚食兩個會太肥 =p 我好鍾意整細細個cream puff，之後放入凍櫃，到想食就攞兩個出來，放返幾分鐘室溫，就食得，放便到不得了。

水 1杯
牛油(無鹽) 6湯匙
糖 1茶匙
鹽 1/4茶匙
麵粉 1杯
蛋 4隻(大)


忌廉 約250毫升
糖 2湯匙

1. 在煲裡，先滾水，再加牛油、糖及鹽，轉中火
2. 離火，加入麵粉，用木棍混合成粉圑
3. 成粉圑後，用中火，煮2-3分鐘(要不斷攪拌)
4. 再離火，待粉圑溫度略為降下，可加蛋，每次加一隻，待完全混合才加第二隻(小貼士: 若粉圑溫度太高，會將蛋煮熟，切勿心急)
5. 焗爐先預熱 180度
6. 將約1湯匙的粉圑放在牛油紙上，重覆
7. 將泡夫焗約30分鐘至表面金黃即可取出
8. 待凍後，將泡夫切半(不要切斷)
9. 在凍的碗中(可事前放入雪櫃約1小時)，用打蛋器打起忌廉至企身，加入糖(小貼士: 天氣較熱的時候，打忌廉時可坐冰水，有助打出靚忌廉，另外，忌廉最好用時先由雪櫃取出)

10. 唧袋放入星型唧咀後，再放入忌廉，唧入泡夫裡即可

木瓜燉雪耳

買咗個燉盅好耐都未有機會用，前兩日行街市生果檔個姐姐係咁話啲木瓜好靚，所以買咗個返屋企。哩排成日開冷氣訓，皮膚好乾，食糖水啱哂，木瓜雪耳又簡單又有益 =P

木瓜   半個, 切開成細塊
雪耳   一隻, 浸軟
南北杏   共一湯匙
冰糖     約3湯匙
水    1杯








1. 先將已浸腍的雪耳切成較細塊
2. 將所有材料放入燉盅裡, 隔水燉約1.5小時即可





自家小貼士:
燉野時要注意水份，唔好太小水，多啲水多啲蒸，迫哂啲精華出來，會好味啲。

鳯梨酥

讀者意見，話想見到多啲甜品。好啦，盡量滿足吓大家o既要求啦...不過，其實我唔係成日整甜品，睇心情啦 =P 哩個, 唔係平時會見到o既鳯梨酥, 係新"西式"o既鳯梨酥，希望大家鍾意啦

材料:

puff pastry酥皮 1塊

罐頭菠蘿 1罐(保留水份)

砂糖 約1湯匙

無色透明啫喱 1茶匙

製作:

1. 酥皮用圓木棍壓至3mm厚

2. 在酥皮上平均灑上砂糖後切成3cm x 3cm方塊

3. 將每塊菠蘿切成6小塊，於每塊酥皮都放一粒

4. 透明啫喱與1茶匙罐頭菠蘿汁混合後塗上菠蘿上，放回雪櫃約15分鐘

5. 用200C 焗約15分鐘，至表面金黃即可