越式燒雞配三色薯片

昨晚曼聯大戰紐卡素，老公是鰻迷，一早講定要在家中食飯同睇波。不過以往經驗，一睇波，他就會十問九唔應，所以為免整餐飯都自言自語，我一早計好時間，待中場休息才開飯，幸好，計劃成功 :) 

睇波一定會飲啤酒，食燒雞和薯片 perfect match ! 今次的越式燒雞是前年去蜆港旅行時學的，非常簡單。醃料主要材料是魚露、青檸汁、蒜和乾蔥。想令味道更豐富可以加香茅或花生醬。不過用任何醃料，最重要都是有足夠時間醃雞 (我喜歡醃8小時或以上)，放入焗爐前一小時，我會將雞放在烤架上，讓雞皮表面風乾，雞皮會較脆。除了燒雞，還焗了三色薯片。焗薯片比油炸健康得多，只需用少量橄欖油，就可做到卜卜脆，關鍵是要切得夠薄，有廚師機幫手，絕對零難度。不用一分鐘，就已經將薯仔和蕃薯切好，超方便。

至於焗爐設定，烤雞時我用了hot air grill (上發熱線 + 風)，焗盤放在中層。約20分鐘後將烤雞移到底層，將放了薯片的焗盤放最頂，轉用3D hot air plus。3D hot air plus 是熱風，熱力均勻，可以同時將高中底三層的食物同時烹調。以往用其他焗爐，多層煮食時會有熱力不均勻的情況，令到食物一面燶一面生 (或要焗到中途開焗爐將焗盤調轉放) Bosch 就沒有這個問題，德國設計果然可靠 !

今次用了椰菜絲伴碟，與濃味的雞非常配合。另外亦做了新鮮芒果蘸醬，配燒雞或沾薯片都好味。

蕃茄濃蝦湯

蕃茄含豐富維他命和抗氧化物，所以我每個禮拜都會用來煲湯。排骨、三文魚、牛尾都是我喜歡加入蕃茄湯的材料，可以提升味道之餘亦可以當餸食。最近無意中發現了一個新食法，就是用蝦頭煲湯。嘩，真的沒想過，原來幾個蝦頭已經可以令煲湯好濃味! 而最開心的就是可以物盡其用，又慳到錢 =P

濃蝦湯最重要當然係味道要夠濃，所以二人份量我已經用了三個大蕃茄。至於其他蔬菜就隨意，紅蘿蔔、洋蔥、椰菜、西芹、粟米...總之當時雪櫃有甚麼就放入去煲。

櫻花蝦炒椰菜

今年o既夏天好似來比往年早，連粽都未食就已經30度，都唔知幾時先涼返啲。天氣咁熱，唔係太想入廚房，所以哩排都係煮啲簡單啲o既餸。

之前去台灣旅行，買咗包櫻花蝦(其實香港超市都有，唔洗去台灣買=P )，試煮咗幾樣野，效果唔錯。雖然味道相似，但櫻花蝦同蝦米o既口感好唔同，值得投資買返包。為咗令個餸得香口，我加咗少少芝蔴入去...同時又成功將佢變成一個高鈣菜色，一舉兩得~ 

雞肉野菜炒飯

連續幾晚都係得一個喺屋企食飯。早兩晚開始，懶洗電飯煲...懶人總會諗到懶o既方法...就係一晚煮兩晚o既飯 =D 不過始終放過夜，哩排啲天氣又唔凍又唔熱，第二晚都係炒一炒佢穩陣啲。食咗兩晚薑炒飯，有啲悶，一於諗吓其他花款~ 

今晚個炒飯，除咗係用冷飯外仲用咗"冷雞"，哈哈，即係隔夜o既切雞 =p

魚柳粉絲椰菜卷

一定係前幾個禮拜日日開party，食得太多熱氣野，哩幾日"青春"咗好多>_<"" 不得了，要食返清啲先。所以尋晚都係蒸同烚，唔敢再煎煎炸炸。一路都好想試整俄式椰菜卷...不過成日都唔夠時間，心血來潮，整咗哩個中式椰菜卷。其實材料唔係太特別，不過選用粉絲同椰菜係因為想吸收返啲魚汁。味道都幾滿意，下次試吓用其他材料卷。