香茜青口長通粉

萬眾期待的<衝上雲霄2> 前晚終於首播，隨咗片頭同片尾曲有啲令人失望之外，成套劇真係幾好睇。其實都唔怪得林子祥o既...平心而論，首歌本身唔係咁差，只係配錯劇啫。全成都忙於追劇，仲邊有人會有心機煮飯呢? 哩兩晚我都係hea煮，但求食得飽同埋可以早啲食完飯，洗埋碗之後坐定定睇Sam哥。

為求達到快煮快食快洗的原則，哩幾晚都轉食意粉，由煮到食都係20分鐘，最緊要係，煮意粉冇咩碗洗。為咗慳時間尋晚放工冇去買餸，睇吓冰箱有咩儲備，一開門就見到我近期最愛的急凍青口，就整個青口意粉啦~

酒香雞

哩個係參考may姐o既食譜，再加小小"創意"。原本個食譜係叫"珊姐雞"，基本上由醃雞到浸我都跟住may姐o既食譜，唯獨最後嗰個汁，我就冇用紹興酒，改用白酒(其實係因為咁啱屋企支紹興酒用哂自己又唔知，唯有用白酒頂上)。 哩個食譜我整過幾次，可能係先入為主，我覺得用白酒整個味清小小，比起用紹興酒調味仲好食。不過味道都係見仁見智，自己鍾意用乜咪用乜囉 =)

白酒比目魚

南瓜系列完滿結束，唔突然諗唔到煮咩添。終於，都係整咗比目魚。哩個煮法想試咗好耐，簡簡單單又幾好食喎。想食中餐可配飯，想食西餐就配薯仔，幾百搭架~

比目魚  3-4片
車厘茄  約10粒,切半
白酒  3/4杯
蒜蓉  1/2茶匙
牛油 1湯匙
鹽 1/2茶匙
糖 1/2茶匙

1.先用鹽將比目魚略醃
2.用牛油，以慢火爆香蒜蓉，轉大火加入比目魚，煎至金黃，反轉
3.煎至另一面都金黃可加車厘茄，炒勻後加入白酒及糖
4.煮約兩分鐘可將比目魚盛起，再煮白酒至剩下一半份量即可淋在比目魚上

野菌意大利飯