脆脆燕麥南瓜餅

燕麥片是不少愛美女士廚櫃必備的食材，除了可以降低血脂，亦有助腸道及心臓健康，多吃有益。不過燕麥本身味道好淡，單獨食會覺得有點 "寡"，所以好多時我都會配其他食物烹調，例如焗麵包時灑一點上頂。上個月出席一個商會晚宴，小禮品包內竟然有一袋原片燕麥。原片燕麥我通常會用作烹調脆口/焗的食物，因為口感較好 (若是煮麥皮，那我就會用快熟燕麥片)。

今次的食譜雖然用咗燕麥，本應好健康，但烹調方法是用油煎(太諷刺)，若果想較健康的話，可以放入焗爐，不過烹調時間就比煎長一點，大約15分鐘左右 (@ 180-200C)。

南瓜  約200克, 刨絲
蛋  1隻
麵粉  3湯匙
洋蔥  1/4個, 切幼絲
火腿  1片(切幼條) *素食者可加紅蘿蔔或甜椒絲
水牛芝士絲  1-2湯匙
原片燕麥   約2-3湯匙
鹽及黑椒  少許

1. 先將蛋打散，再與南瓜、洋蔥、火腿、芝士及麵粉混合
2. 按個人口味用鹽及黑椒調味
3. 用乾淨的手，將南瓜料壓成約半吋的餅
4. 灑上燕麥片
5. 以中火，用少許橄欖油，將南瓜餅煎至兩面微金黃即可(每面約2-3分鐘)


**小貼士，煎太長時間的話，南瓜絲會變成"南瓜蓉" 口感較腍