蘑菇焗蛋餅

好多時買材料煮西餐，只係用得一部份，到第二晚，因為唔想食同昨晚同樣的菜色，最終，都係浪費剩餘食材。尋日朝早打開雪櫃，又"發現"一啲前晚的剩餘物資，諗咗一諗，見到有蛋，不如就整個frittata啦。

傳統的做法，會先將材料爆香至半熟，再加入蛋漿拌均，在平底鍋裡煎至底部金黃，之後移到焗爐，焗至表面都金黃及蛋漿熟透。我今次哩個版本同傳統做法有啲唔同，分別係先將材料炒至半熟，再平均地分在muffin模裡，再倒入蛋漿焗。除此之外，為咗讓蛋更腍更滑，我喺蛋漿裡加咗少少奶，可算係另一種口味。唯獨是味道會較用純蛋漿的做法冇咁香口。