矽膠保鮮膜

由讀書嗰時，就已經好鍾意行無印良品。以前當然係買單行簿同筆，到幾年前，開始留意佢地啲廚具。雖然好貴，但睇吓都會好開心，有時攞吓靈感，行開十蚊店，搵吓類似o既代替品。


最年興起矽膠杯蓋，辦公室內，幾乎每個女同事都用緊。原來無印都有賣...不過，係全透明白色...冇咩特別。引起我注意o既，係放喺隔離o既矽膠保鮮膜。見到佢個display，黏力都唔錯，所以買咗塊返屋企。

返到屋企即刻玩吓新玩具。唔好睇佢啲邊唔貼，其實佢都幾貼個碗面，不過細啲o既碗容易啲貼啲。大碗就要"玩"一陣先可以令佢貼貼服服。另外一提，就係磨砂碗; 因為我屋企都有好幾隻，一定要試埋。不過哩塊矽膠似乎同磨砂唔係朋友，因為比起玻璃碗真係冇咁貼。


至於保養方面，只要用清水洗，自然乾便可。