忌廉蘆筍湯 (Spargelcremesuppe)

忌廉蘆筍湯係傳統德國菜入面常見的菜色。尤其到每年四至六月的Spargelzeit，即蘆筍季節，每間餐廳的菜牌都會有哩個湯。雖然而家唔係蘆筍盛產o既季節，為咗配合我尋晚o既"德國之夜"，所以特別煮咗兩碗。

首先，要表明今次係我第一次煮德國菜(咸豬手例外)，而我亦從未去過德國旅行，只係讀書時學過幾句德文。所以"德國之夜" o既食譜全部都係上網搵的，而且係較簡單的食譜。實在今次做完資料搜集後，發覺原來好多歐洲國家o既烹調技巧同材料都有啲相似。可能係鄰國的關係，喺我熟識o既菜色當中，我覺得意大利或法國菜同德國菜最似。

我幾鐘意哩個忌廉蘆筍湯食譜，簡簡單單，食譜主要係來自一個德國婆婆的網頁 (再參考其他食譜加加減減)。鐘意係因為婆婆介紹咗一個 "一筍二食" 的方法，都幾啱用，因為我地通常喺超市買到的蘆筍好大包，只係做湯的話會用唔哂。一筍二食，係先切開蘆筍葉(即蘆筍尖)，灼熟後用來伴hollandaise sauce，用來灼蘆筍的水變成"湯底"，加入莖部再煮湯，令湯的蘆筍味較濃。

蘆筍  約300克 (切至約2吋長, 分開葉和莖)

牛油  1湯匙

麵粉  1湯匙

乾蔥  1粒, 切絲

忌廉 (或鮮奶)  1杯 (選用忌廉會較滑和香濃) 

蕃茜  1湯匙, 切碎

鹽/黑椒/肉豆蔻粉(nutmeg)  隨意 (少許)

1.  在煲裡，先將約半公升(500毫升)水煲滾，加少許鹽，再加入蘆筍葉，灼至全熟(約2-3分鐘，視乎粗度)

2.  盛起蘆筍葉，可保留一兩條做湯的裝飾，其他可配hollandaise sauce 食

3.  加入蘆筍莖，煮約6-8分鐘，至蘆筍變腍

4. 盛起蘆筍莖(不要水份)，放入食物處理器打成蓉 

5. 若喜歡較幼滑的口感，可將蘆筍蓉過篩，備用

6. 以中火，於另一煲裡用牛油爆香乾蔥，再加入麵粉拌勻(加入麵粉後要常常攪拌)

7. 轉大火，加回蘆筍蓉及忌廉，不停攪拌

8. 視乎個人喜歡的稀稠程度，加入蘆筍水(灼蘆筍的水)，煮滾後加入蕃茜、肉豆蔻粉、鹽及黑椒調味即可