20.10.13

大閘蟹 101

閘蟹季節到喇! 眼見個個 facebook, instagram, 微博晚晚都係上載大閘蟹相,真係睇到口水都流埋 =)

講方便,當然係出街食啦,食完又唔洗清理戰場,不過喺屋企食實惠得多,又可以慢慢食。其實要喺屋企食大閘蟹一啲都唔難,以下係我自己食大閘蟹o既少少分享。雖然我唔算係什麼食家,好多都係靠問蟹舖啲叔叔學返來,正所謂一次生,兩次熟,大家都試吓啦 ~





Q: 點揀靚大閘蟹?

A第一要夠重,目標重量5至6両最好 (一両約38克,5至6両即約200克左右) 只得三至四両的蟹唔係唔好,不過膏會較少。之後要睇吓佢對眼,若蟹眼精靈眼仔碌碌咁即表示新鮮。最後要睇吓個蟹肚,話哂食大閘蟹都係為咗啲蟹膏,通常蟹肚偏脹o既蟹會較多膏。

Q:  究竟幾時食公幾時食乸好呢?

A俗語有云「九月圓十月尖」,(當然係講緊農曆啦) 中秋過後就係大閘蟹季節,由於蟹乸較早熟,所以九月時蟹乸的膏會比較多。到了十月尖肚的蟹公成熟,適宜進食。至於味道同口感,蟹公o既膏較軟身,蟹乸就較硬身,所以究竟公定乸就視乎個人喜好軟膏或硬膏,

Q: 如何清洗及蒸大閘蟹?

A先用刷擦淨蟹殼表面,尤其係有毛毛的位置,因為嗰到較易藏污泥。洗淨後可將蟹反轉放在碟上 (即四腳朝天),咁樣可以避免蒸時蟹膏流出。有啲人會喺每隻蟹下面再放多一片紫蘇葉,不過我通常都只會放紫蘇葉喺啲滾水入面,因為蒸完之後碟上塊紫蘇葉會變得溶溶爛爛(好似啲污泥咁)。通常3至4片紫蘇葉可蒸6隻大閘蟹。首先將紫蘇葉落水,待水滾後可放上蒸隔,再把大閘蟹隔水清蒸 (記住腳要向上)。約6両o既蟹要蒸約20分鐘。至於4-5両o既蟹就要蒸約16-18分鐘 (唔肯定就蒸多一兩分鐘啦)

Q:  應該食膏先定蟹腳先?

A仲洗問? 一定係食膏先! 取出蟹後要趁熱食,通常由蟹蓋開始,先去除蟹蓋內的蟹胃及俗稱"星" 的六角形心臟,之後就可以用小匙羹食豐富的蟹膏。食完蟹膏可轉攻蟹身 (注意蟹腮唔食得),可用已食完的蟹蓋蓋住未食的蟹身,有助保溫。食蟹腳最容易的方法,係用鉸剪剪開蟹腳o既兩端,再用棒棒(或筷子) 穿過蟹腳"篤" 啲肉出來,咁就可以食到一條完整o既蟹肉。最後係蟹鉗,用鉸剪剪開兩邊,一開就有食得。


Q: 點解要飲薑茶?

A眾所周知大閘蟹又寒又濕,飲薑茶有助驅寒。食蟹時蘸薑醋食亦有助驅寒。


懶得睇字o既朋友, 可以睇圖解 =)




自家蟹醋 (醋或糖的份量可按個人喜好調製)

鎮江醋或紅醋
黑沙糖  
薑絲

製作: 先將醋及黑沙糖拌勻,再加入薑絲即可。



自家薑茶 (2人前)

薑   約5-6片
片糖或黑沙糖


製作: 水滾後加入薑片及糖,煲約10分鐘待薑出味即可


沒有留言:

發佈留言

Related Posts Plugin for WordPress, Blogger...